ولد وبنت..هى الحياة كده..آدم حزين مستنى حوا تونسه وتكمله..من بداية الكون وربنا خللا الحكاية كده..ولأن الرجا والمبتغى من هذه الدنيا الفونيا..هو اننا نكون سعدا..فلازم نرجع للبداية ..للولد والبنت
لو انتوا مخطوبين مثلا اوعوا تخلوا هم الشقة والجهاز والغسالة والسخان وكل الكلام ده يخطف منكم سر السعادة..افتكروا انكم مع بعض..بصوا فى عيون بعض هتلاقوا السعادة حاضرة بدون مقدمات
ولو انتوا متجوزين اوعوا تحطوا راسكم ع المخدة وانتو شايلين هم البيت والعيال والمجتمع والناس..احضنوا بعض اوى..مش لأن ده واجب او متاح..لأه..انما عشان ده سر السعادة..بوسوا بعض بجد وافتكرو ان دى نعمة لا يقدرها الا من هم على شاكلتى_يا محرومين م البوس اوى يا احنا_ولأن دى بجد السعادة ومفيش انسان على وجه الارض من حقه يبقى تعيس الا اللى اتحرم من حبيبه ومش قادر يعيش الحكاية زى ما رب الكون خلقها..بولد وبنت
....
نداء للبؤساء
عزيزى آدم الوحدانى
اوعى تستسلم لوحدة تخنقك وتعجزك
دور على حبيبتك وجنتك
متنشغلش عنها بالحزن لأنها اكيد مستنياك
ومتنسهاش وانت بتعد النجوم
وافتكر ان النجوم مالهاش عدد
زى البنات
ملو الشوارع والبيوت
دور عليها فى العيون
وهتلاقيها من بين الف عين بتلوم
هى الوحيدة بتحضنك
..دور يا عم
....
عزيزتى حوا الواحدانية
يا خايفة من كل الحاجات
ومتحصنة بدمع وسكات
متخافيش وانسى القلق
..وبلاش كسوف
مدى العيون
لو تقدرى مدى الايدين وبلاها خوف
حقك يا بنوتة وعايزة تلاقيه
بحر الامان والتفاهم والسند
موجود هناك..
نايم على كتاف الرجال
بصى عليه وهتعرفيه
بصى يا بت..
ميهمكيش من حد