عندي مشكله ساعدوني في حالها .. ما بقتش عارفه افكر لوحدي

انا عندي مشكله صعبه جداا .. ياريت بجد تساعدوني اني احلهاا ..
انا بحب واحد .. وهو كمان بيحبنى .. تقدرو تقولوا بنحب بعض من واحنا كنا صغيرين .. يعني انا 8 سنين وهو 12 سنه ..في العمر ده هو قالي بحبك.. لكن ما كناش بنتكلم كتير .. وهو يعتبر جاري .. وكلامنا مع بعض عادي جدا يعني .. مجرد سلام .. او هزار او سؤال بس . لكن مش خروجات ولا فسح ولا كلام من ده .. بس هو مره قالي انا بحبك .. وهيه دي الحلقه الرومانسيه الي حصلت من بينا في حياتنا كلها .. ..
المهم انا جيت سافرت لدبي علشان بابا عايش هناك .. وكنت بنزل مصر كل سنه .. وهو بعدها بكم سنه جالو عقد عمل في دبي ومن مده لمده كان بيجي يزورنا في البيت .. وكنا ديما على اتصال .. وبينا مسجات عاديه ..
المهم هو بعدها بفتره خطبنى .. بس خطبنى من خالتي وخالتي قالتلي وانا سكت.. وكان عندي 19 سنه .. بس والله انا سكت لانه الظروف حكمت عليه اني السكت لكن والله انا بحبه وبتمنااه وسكت غصب عنى وقولت اني هسكت على اساس انه الامور والظروف تتحسن عندنا وبعدين يتكلم في المواضيع دي
( الظروف هيه انه انا بابا تجار معرووف وعنده فلوس .. والواد الي بحبه على قد حاله وبيشتغل مهندس في شركه وبياخد في شهر 5000 درهم وده بنسبه لبابا قليل .. على انه مش هيقدر يعيشني عيشه كويسه .. لانه عندي اختي الي اكبر مني حصلها نفس الموقف بتاعي ده وهيه بتحبه حبيبها وحبيبها بيحبها من زمان ولما تقدملها بابا ما وافقش على اساس انه مرتبه متسوط وقال انه مش هيقدر يعيشها عيشه كويسه .. وبعد محاولات كتير وطبعا بابا خاصم اختى كتير وقالها لو تجوزتي غصب عني مش هرضى عنك .. واختي سكتت وكتمت في قلبها لكن مازالت مستمره مع حبيبها .. الى من تقريبا شهر ابويه حن عليها وقالها خلاص انا موافق انك تجوزي الراجل الي بتحبيه والحمدلله كتبو الكتاب اول ما بابا وافق ) ..

فانا تقريبا لما الراجل الي بحبه جيه كلم خالتي وخالتي قالتلي و سكت لاني كنت خايفه من بابا وقولت انه هيتنرفز مني لو عرف اني انا كمان بمر في نفس حالة اختي .. فخالتي راحلت قالت لراجل الي بحبه اني مش موافقه ..
المهم هو حاول كتير مع خالي ومع خالي التاني وخالتي بس كلهم كانو خايفين من ردة فعل بابا .. فقالو انه البنت مش موافقه .. مع اني انا كنت بموت فيه ونفسي نفسي يكون هو الراجل الي اكمل معاه بقية حياتي
وبنفس الوقت وانا كان من جوايا كنت مطمنه انه يخطب او يتجوز .. لانه هو عنده تلات اخوات اولاد اكبر منه ومش متجوزين .. فقولت مستحيل مثلا يتجوز واخوه الكبير لسه مش ماتجوزش .. لانه هما من بينهم احترام كبير ..
وبعد تلات سنين على الكلام ده اتصل بيه بنفسه وقالي انه خطب واحده تانيه طبعا انا زعلت اوي وقولتله ربنا يسعدك ويوفقك .. وانا من شهر واكتر دلوقتي حالتي النفسيه زفته اوي .. وغير العياط والكلام من ده .. وغير كدا انا ما بتصلش بيه خالص .. بس هو الي بيتصل بيه من وقت لوقت وبيكلمنى .. وساعات بيتصل بيه وما بردش عليه .. بس من كتر شوقي ليه برجع وبتصل بيه تاني .. وغير كدا انه ساعات لما يتصل بيه وما بردش عليه .. وارجع اتصل بيه تاني ما بيردش عليه هو وبقول ممكن يتصل تاني بس ما بشوفش منه أي اتصال والموقف ده حصل تلات مرات .. انه يتصل بيه وما بردش وارجع اتصل بيه انا بلاقيه هو الي ما بيردش ..
انا في حيره .. انا بحبه اووي .. ما اقدرش اتخيل نفسي مع انسان تاني غيره .. لانه من اول ما بدات اعرف الحب شفته هو قدامي .. وشفت فيه كل الاحلام الي كنت بتمناه .. وغير كدا انا دخلت الجامعه وعندي زمايلي تقدمولي .. وكتير من اولاد صحاب بابا تقدمولي وانا رفضت .. والسبب اني بحب الانسان ده .. وبقول ممكن الظروف تتحسن وبابا يعرف يقدر موقفي ويوافق .. وعلى فكره هو مازال بيحبنى لحد دلوقتي .. وده واضح من صوته لما بيكلمنى ساعات .. انصحوني اعمل ايه .. ما اقدرش اسيبه .. صعب جدا جدا ..